Ngā pānui o te pahi e reo Māori ana, e reo Pākehā ana hoki busaudiopreview

Kua whakarewangia e Auckland Transport he pānui ā-oro e reorua ana puta noa i tana kōtuinga pahi hei whakapai ake i ngā ratonga ki ngā kirihoko.


Ngā pānui ā-oro o te pahi

E pīrangi ana a Auckland Transport ki te whakapai ake i ā tātou ratonga ki ngā kirihoko mā te tuku i ngā whakawhitinga kōrero whaihua, e whakaatangia ai te kanorau o Tāmaki Makaurau.

He pānui ā-oro e reo Māori ana, e reo Pākehā ana hoki, kei ngā pahi o ngā ara o te Hono, e whakamōhio ana i ngā pāhihi ki te tūnga ka whai ake. I whakapā atu tō mātou tīma ki a Blind Citizens NZ, ki tō AT Tīma Areare ki ngā Māori, ki Te Kaunihera o Tāmaki Makaurau hoki kia whakarewangia ngā pānui ā-oro hou o te pahi, e reo Māori ana, e reo Pākehā ana hoki, kia whaihua ai te katoa, hei painga hoki mō te katoa.

Ngā momo pānui ā-oro

  • Ngā ingoa o ia tūnga pahi i te ara. I te wā tonu e haeretia ana te ara, ka pāhotia te ingoa o te tūnga ka whai ake, tae noa ki te tūnga whakamutunga. Ka rite ngā ingoa ki ērā kei AT Mobile me AT Journey Planner.
  • Ngā whakawhitinga ki ngā haerenga mā te pahi, mā te tereina, mā te waka kōpiko rānei. I ētahi wāhi matua, i muri i te pānui mō te tūnga ka whai ake, ka pāhotia ngā karere mō te whakawhitinga hei tohu i te āheinga o te whakawhitinga i te tūnga ka whai ake kia haere mā pahi kē atu, mā tereina kē atu rānei, mā waka kōpiko kē atu rānei.
  • He karere e mōhiotia ake ai te wāhi (ākuanei tae mai ai). Ka whakatata ana ki ētahi wāhi tawhito huri noa i Tāmaki Makaurau, ka pāhotia he kōrero whai tikanga mō aua wāhi rā.

Ngā whakapainga ake ki ngā pānui

  • Te mōhio ake ki te wāhi o te haerenga kei reira nā tō pahi, me ngā ingoa o ngā tūnga pahi kua whakapaingia ake, e māmā ake ai te whakahāngai i ia tūnga ki ngā tūtohu whenua rongonui e tata ana.
  • Mā ngā tohutohu whaihua ā-oro koe hei āwhina kia mōhio ki te wāhi kei reira nā koe i tō haerenga. Ka whaitake tēnei ki te hunga e pura nei ngā kanohi, i ngā wā hoki he uaua te kite atu, pēnei i te pō, i ngā wā rānei e hāereere ana mā ētahi wāhi tauhou.
  • Te mohio ki te wāhi, ki te wā hoki me whakawhiti koe, ki te āhua hoki e tutuki ai. Mā ngā pānui ā-oro hou o te pahi hei whāngai ēnei pārongo, hei āwhina hoki kia māmā ake tō haerenga.
  • Ngā raruraru o te wā ka pā ki ngā waka, pēnei i ngā wā kua kati tō pahi, e whai wā ai koe ki te panoni i ō whakaritenga.

Te Oro Reo Māori

Ka puta ngātahi te oro reo Māori me te oro reo Pākehā: Ko tā te reoruatanga o ngā oro he:

  • Tautoko i te āpitihanga o te Mahere Pakihi 2021/2022 a AT ki ō Te Kaunihera o Tāmaki Makaurau huanga mō te oranga, ki āna whāinga hoki i tōna tikanga me tutuki, ki ngā tūmanako anō hoki i raro i te Tiriti o Waitangi
  • Whakarite i ngā rawapuni, i ngā ratonga hoki e hāngai ana, e manaaki ana hoki i te hunga ko te reo Māori - tētahi reo whai mana ā-ture o Aotearoa - tōna reo tuatahi
  • Tuku āpitihanga anō ki te kōtuinga reorua o nāia tonu nei - e whai huarahi wātea atu anō ai kia kitea, kia rangona hoki te reo puta noa i Tāmaki Makaurau

He mea whakahaere ngā whakawhitinga ki te reo Māori e te tīma mō te Kaupapa Here me te Toronga ā-Māori.

Te rā e tīmata ai

Kua whai pūrere ā-oro hou kē ētahi pahi i ōna wāhi o te tāone. Ka āta whakaputaina haeretia ngā pānui puta noa i te kōtuinga o Auckland Transport i te roanga o te tau 2022 ki te tau 2023, otiia, kei te āhua o te wā e tae mai ai ngā taputapu i tāwāhi.